பதிவர் சந்திப்பு 2013 - 1 - எழுத்தாளர் கண்மணி குணசேகரனின் முந்தானை!

வணக்கம் வலை நண்பர்களே,

கடந்த ஞாயிறு(01-09-2013) அன்று சென்னையில் பதிவுலக நண்பர்களால் பதிவர் சந்திப்பு மிக பிரம்மாண்டமாக நடந்தது. சந்திப்பு பற்றிய பதிவுகள் நிறைய நண்பர்களால் எழுதப்பட்டு வரும் இவ்வேளையில், சந்திப்பு பற்றிய என் முதல் பதிவாக,  பிற்பகல் நடந்த விழாவில் சிறப்பு விருந்தினராக கலந்து கொண்ட எழுத்தாளர் திரு. கண்மணி குணசேகரன் அவர்களின் பேச்சிலிருந்து ஆரம்பிக்கிறேன். தனது கணீர் குரலில் பல்வேறு குட்டிக்கதைகள் சொல்லி, நகைச்சுவை ததும்ப பேசிய, அவர் சொன்ன சிறுகதைகளில் என் நினைவில் நின்ற கதையை உங்களிடம் பகிர்ந்து கொள்கிறேன்.

இரவு நேரம்... அந்த வீட்டில் ஒரு தம்பதி இருக்கிறார்கள். 
அவர்களுக்குள் சிறு வாக்குவாதம் நடந்து கொண்டிருக்கிறது...
கணவன் பேசிக் கொண்டே மனைவி முந்தானையை இழுக்கிறான். அவளோ அவன் கையை தட்டி முந்தானையை பிடுங்குகிறாள்... இவன் மறுபடியும் முந்தானையை இழுக்கிறான்... அவளோ மறுபடியும் அவனைத் தட்டி விட்டு முந்தானையை பிடுங்குகிறாள்.. அவனாலும் முந்தானை இழுப்பதை நிறுத்த முடியவில்லை. அவளும் அவனுக்கு இடம் தரவில்லை. இப்படியே கொஞ்ச நேரம் அவர்களுக்குள் முந்தானைப் போராட்டம் நடந்தது. 

சிறிது நேரத்தில் பொறுமையை தொலைத்த அவள் "இந்தா பிடி.. நான் எவ்வளவு சொல்லியும் நீ திருந்த மாட்ட" என சொல்லியபடி அவனுக்கு ஒரு சிகரெட்டை தருகிறாள். 

அவனைத் திருத்த முயற்சிக்கும் மனைவி, தனது முயற்சியில் தோற்கிறாள் என்பதை உணர்த்துகிறது அவரது இச்சிறுகதை

நண்பர்களே, என்ன கதை பிடித்திருக்கிறதா? இது மாதிரியான எதார்த்த சம்பவங்களை கருவாக எடுத்து கதை சொல்வதே திரு. கண்மணி குணசேகரனின் சிறப்பு.

திரு. கண்மணி குணசேகரன் பற்றி அறிந்து கொள்ள இங்கே கிளிக்குங்கள்.

பதிவர் சந்திப்பு பற்றிய பதிவுகள், புகைப்படங்கள் இன்னும் வரும்.