ஐந்தே நிமிடங்களில் அவித்த முட்டை செய்வது எப்படி? வாசி'ஸ் கிச்சன்

        வீட்டில் மட்டும் சமைத்து ருசி பார்த்துக் கொண்டிருந்த நான் இன்று வெளியான இரண்டு முக்கிய சமையல் பதிவுகளால் சற்று ஆடிப்போனேன். ஏனெனில் உப்பு, எண்ணெய், காரம், புளிப்பு, இனிப்பு என எதுவும் சேர்க்காமல் தண்ணீரை சுவையானதாக உடலுக்கு ஆரோக்கியமான, இதமான சுடு தண்ணீராக சமைப்பது எப்படி என பதிவுகள் போட்டு அனைவரின் வீட்டிலும் புதியதொரு சமையல் குறிப்பை ஆடவர்களிடத்தில் அளித்து பெரும் சேவை செய்திருந்தார்கள். அவர்களது சுடு தண்ணீரை வச்சு, சுவையான, குழந்தைகள் முதல் பெரியவர்கள் வரை வாயினுள் திணித்து சாப்பிடும் அவித்த முட்டை செய்வது எப்படின்னு உங்களுக்கு இங்க சொல்லப் போறேன்...

நண்பர்களே,
சுவையான அவித்த முட்டை சமைப்பது எப்படி என்ற அருமையான டிப்ஸ் இதோ உங்கள் முன்.... 

சீனு'ஸ் கிச்சனில் அவித்த முட்டை எப்படி செய்வது என கேட்டிருந்த மனதில் உறுதி வேண்டும் "மணிமாறன்" அவர்களுக்காக இந்த பதிவு.

          வாங்க வாசி'ஸ் கிச்சன் போலாம்.. ஆனா, கிச்சன் போறதுக்கு முன்னாடி மொதல்ல கடைக்கு போகணும். அவித்த முட்டை செய்றதுக்கான தேவையான பொருளான முட்டை வாங்கும் போது சில விசயங்களை கவனமாக கடைபிடிக்க வேண்டும். 

அவை என்னென்ன?

         பிராய்லர் முட்டை, நாட்டுக்கோழி முட்டை, போந்தா கோழி முட்டை என பலவகை கோழி முட்டைகள் இருந்தாலும் கடையில் அதிகமா கிடைக்கும் பிராய்லர் முட்டையே நம்ம சாய்ஸ் ஆக வச்சுக்கலாம்.

              1. முட்டை கோழிப்பீய் இல்லாம இருக்கான்னு பாக்கணும். (இருந்தாலும் பரவாயில்ல கழுவிக்கலாம்).

              2. முட்டை உடையாம இருக்கான்னு பாக்கணும்.

              3. முட்டை முட்டை வடிவத்துல இருக்கான்னு பாக்கணும்.

              4. நமக்கு பிடிச்ச முட்டையை சூஸ் செஞ்சு உடையாம இருக்க முட்டை பாக்ஸில் வாங்க வேணும்.

வாங்க கிச்சன் போலாம்...

தேவையான பொருட்கள்:
       1. அகலமான பாத்திரம் ஒன்று.
       2. முட்டை ஒன்று
       3. தேவையான அளவு உப்பு (தேவையான அளவு என்பதை உங்கள் அனுபவத்தில் தெரிந்து கொள்ளலாம்).
       4. சுத்தமான தண்ணீர்.

செய்முறை விளக்கம்:

          1. கடையில் பார்த்து பார்த்து வாங்கிட்டு வந்த முட்டையை நல்ல தண்ணீரில் கழுவ வேண்டும். கழுவும் போது முட்டை உடையாமல் கவனமாக கழுவுவது அவசியம். 

          2. பாத்திரத்தை அடுப்பில் வைத்து ஒரு முட்டை நன்றாக மூழ்கும் அளவு சுத்தமான தண்ணீரை நிரப்ப வேண்டும்.

        3. பின்னர் அடுப்பை பற்ற வைத்து தண்ணீர் நன்றாக சூடு ஆகி கொதித்து வரும் வரை காத்திருக்கவும். (அந்த நேரத்தில் ஏதாவது செய்கிறோம் பேர்வழி என முட்டையை உடைக்காமல் இருக்கவும்).

            4. தண்ணீர் தேவையான அளவு சூடாகி கொதித்தவுடன் முட்டையை மெதுவாக பாத்திரத்தில் இடுக்கி துணையுடன் வைக்கவும்.

             5. எடுத்து வைத்த உப்பை பாத்திரத்தில் போடவும்.

          6. முட்டை பாத்திரத்தில் போட்டதிலிருந்து சுமார் ஐந்து நிமிடத்தில் பக்குவமாக அவிந்து விடும். (அல்லது) முட்டை ஓடு வெந்து சிறு சிறு விரிசல் விட்டிருந்தால் முட்டை அவிந்து விட்டது என அறியலாம். முட்டை அவிந்ததை அறிய இம்முறையை தான் நான் எப்போதும் பயன்படுத்துவேன்.

            7. அவித்த முட்டையை பார்த்து உடனே ஆர்வமாகி கையை விட்டால் கை சுடு தண்ணீரால் வெந்து விடும். எனவே சுத்தமான இடுக்கி துணையுடன் முட்டையை எடுத்து குளிர்ந்த தண்ணீரில் போட வேண்டும்.

         8. சில நொடிகள் குளிர்ந்த நீரில் முட்டை இருந்தவுடன் எடுத்து முட்டை ஓட்டை மெதுவாக உரிக்க வேண்டும்.

            9. முட்டை ஓட்டை உரித்தவுடன் நாம் சாப்பிட தேவையான அவித்த முட்டை தயாராகி விடும்.

        ஐந்தே நிமிடத்தில் சுவையான அவித்த முட்டை உங்கள் வீட்டிலேயே தயார். எந்த உணவுடனும் அவித்த முட்டையை வாயில் போட்டு சப்புக்கொட்டி முழுங்கலாம்.

இத்துடன் அவித்த முட்டை சமைப்பது என்ற டிப்ஸ் முடிந்தது. முட்டை அவிப்பதற்கு முன், தண்ணீரை கொதிக்க வைக்க வழிமுறை தெரியவில்லையா? இதோ சீனு'ஸ் கிச்சன், ஆவி'ஸ் கிச்சன் பதிவை வாசிக்கவும்.