என் சொத்து யாருக்கும் அல்ல. விடுகதைகளுக்கான விடைகள்

நண்பர்களே,

எனது சொத்தை தருகிறேன். ஆனா ஒரு நிபந்தனை?

      மேற்கண்ட இடுகையில் சில விடுகதைகள் போட்டிருந்தேன். அதற்கான விடைகள் அடுத்த இடுகையில் வரும் என சொல்லி இருந்தேன். ஆனால் நேரம் இல்லாமையால் அந்த இடுகையில் விடைகளை போட இயலவில்லை. இதோ இன்றைய இடுகையில் விடைகளை இட்டுள்ளேன். ஓரிரு விடுகதைகளுக்கு சரியாக பதிலளித்த சத்ரியன், ராஜி அவர்களுக்கு வாழ்த்துக்கள். இருவரும் பத்து விடைகள் சொல்லா விட்டாலும் ஓரிரு விடைகள் சரியாக சொன்னதால் அவர்களுக்கு பரிசாக ஒரு மின் புத்தகம் அனுப்பப்படும். விடைகளை முயற்சித்த பன்னிக்குட்டி ராமசாமிக்கும், மற்றும் பின்னூட்டமிட்ட அனைவர்களுக்கும் வாழ்த்துக்கள்.

இனி விடைகளை காண்போமா?

மலை ஏறி தாள் பறித்து
மகிழ்ந்திருந்து தொன்னை பிடித்து

பத்தினியாள் இட்ட கஞ்சி

பற்றுமில்லை; உப்புமில்லை. அது என்ன?

விடை: பதநீர்

கழுத்துண்டு; கையில்லை

நாக்குண்டு; பேச்சில்லை

வாயுண்டு; அசைவில்லை

தொப்பி உண்டு; தலைமுடியில்லை. அது என்ன?

விடை: பேனா

சிமிழிலே தண்ணீர்

தண்ணீர் மேலே தனிக்கொடி

கோடி மேலே சூரியன். அது என்ன?

விடை: கைவிளக்கு

பூவாமல் காய்ப்பது என்ன காய்? அது

புண்ணின்றிப் புழு புழுக்கும். அது என்ன?

விடை: அத்திப்பழம்

வந்தாரு திரும்பி வந்தாரு

சொல்லுமிடம் வச்சாரு. அது என்ன?

விடை: பல்

நிறங்கறுத்த அழகி நான்;

நித்தம்நித்தம் வேண்டும் அழகி நான்;

ரச அழகி நான்; ருசி அழகி நான். அது என்ன?.

விடை: புளி

ஆட்டமும் பாட்டமும் அதனாலே

தோட்டமும் ஊட்டமும் அதனாலே

கூட்டமும் நாட்டமும் அதனாலே. அது என்ன?

விடை: காற்று

வாய் இல்லை; வார்த்தைகள் சொல்வேன்

உயிர் இல்லை; ஊருக்குப் போவேன்

கால இல்லை; வீட்டுக்கு வருவேன். அது என்ன?

விடை: கடிதம்

மூக்கனுக்கு மூன்று முழ நீளம்

மூக்கன் பொண்டாட்டிக்கு

முளைத்தது அகிலம் அதிகம். அது என்ன?

விடை: வாழைப்பழம், வாழை இலை

மஞ்சள் பூக்கையிலே

மாட்டேன் என்று சொன்னீரே

பிள்ளை பெற்று கையில் கொடுத்தால்

முத்தமிட வந்தீரே. அது என்ன?

விடை: வேர்கடலை

    நண்பர்களே, விடுகதைகளுக்கான விடைகளை தெரிந்து கொண்டீர்களா? நேற்றைய இடுகையில் ஒரு அறிவிப்பு போட்டிருந்தேன். அதில் இந்த இடுகை முதல் ஒரு சவால் காத்திருக்கிறது என போட்டிருந்தேன். அது என்னான்னா இனி ஒவ்வொரு இடுகை முதல் ஒரு பொன்மொழியும், ஒரு விடுகதையும் சேர்ந்தே வரும் என்பதை தெரிவித்துக் கொள்கிறேன். விடுகதைக்கான விடைகள் வழக்கம் போல அடுத்த இடுகையில் வெளிவரும்.

இன்றைய பொன்மொழி:

நண்டைச் சுட்டு நரியை காவலுக்கு வைத்தது போல!

இன்றைய விடுகதை:

ஓஹோ மரத்திலே உச்சாணிக் கிளையிலே
டம்மார அம்மானுக்கு மகமாரி போட்டிருக்கு. அது என்ன?

     

      விடை தெரிந்தவர்கள் இங்கே கருத்துரையில் இட வேண்டாம். எனக்கு மெயில்(thaiprakash1@gmail.com) அனுப்புங்கள். சரியாக சொல்பவர்களுக்கு ஒரு மின் புத்தக இணைப்பு அனுப்பப்படும்.

விடை அடுத்த இடுகையில்...