ஆமையும் , முயலும் மாத்தி யோசிக்குமா?

ஆமையும் , முயலும்

      முயல் தனது வேகத்தில் பெருமை கொண்டு, ஆமையை போட்டிக்கு அழைத்தது. போட்டி ஆரம்பித்தது. முயல் வேகமாக முன்னேறியது. ஆமையோ மேதுவாக ஊர்ந்தது. எனவே முயல் சிறிது ஓய்வு எடுத்து கொண்டு ஆமை இந்த இடத்துக்கு வருவதற்குள், கிளம்பி விடலாம் என எண்ணி கண் அயர்ந்து விட்டது. விழித்து பார்க்கும் போது ஆமை வெற்றி கோட்டை அடைந்து போட்டியை வென்று விட்டது.

இதனால் கிடைக்கும் நீதி:

நிதானமாக தொடர்ந்து செயல்படுதல் வெற்றியை கொடுக்கும். 

இந்தக் கதையை இன்னும் வேறு சில கோணங்களில் மாற்றி அமைத்து பார்ப்போமா? 

    முயல் தோற்று போனதை நினைத்து வெட்கம் அடைந்தது. சுய ஆராய்ச்சி செய்து கொண்டது. அளவுக்கு அதிகமான தன்னம்பிக்கையும், அதனால் காரியம் ஆற்றுவதில் ஏற்ப்பட்ட தொய்வும் தான், தன் தோல்விக்கு காரணம் என்பதை உணர்ந்தது. அதனால் ஆமையை மீண்டும் போட்டிக்கு கூப்பிட்டது. ஆமையும் ஒப்புக் கொண்டது. இம்முறை முயல், முழு தூரத்தையும் ஒரே சமயத்தில் ஓடி, ஆமையை வென்றது.

இதனால் கிடைக்கும் நீதி:

இடைவிடா முயற்சியும், வேகமான செயல் திறனும், நிச்சயம் நிலையான, மெதுவான செயல்பாட்டை வெல்லும். 

    அடுத்து முயலைப் போலவே, ஆமையும் வேறு வழிகளை யோசனை செய்தது. இந்த மாதிரி போட்டியில் தன்னால் முயலை கண்டிப்பாக வெல்ல முடியாது என்பதை உணர்ந்தது. எனவே நன்கு ஆராய்ந்து, வேறொரு பாதையில் போட்டியை வைத்துக் கொள்ளலாம் என முயலை கூப்பிட்டது. முயலும் ஒப்புக் கொண்டது. வழக்கம் போல முயல் வேகமாக ஓடியது. ஆனால் இடையே அகன்ற ஆறு ஒன்று குறுக்கிட்டது. அதை தாண்டி சில மைல் தூரம் ஓடினால் தான் போட்டியை வெல்ல முடியும். ஆற்றை கடக்கும் வழியறியாது, கரையில் முயல் உட்கார்ந்து விட்டது. ஆமை மெதுவாக வந்தது. ஆற்றை நீந்தி கடந்தது, வெற்றி பெற்றது.

இதனால் கிடைக்கும் நீதி:

நம்முடைய தனித் திறமையை உணர்ந்து, அறிந்து அதற்கேற்ற முறையில் விளையாடும் களத்தை மாற்றியமைத்தால், வெற்றி நிச்சயம்.

      முயலும் ஆமையும் எதிரிகளா? முயல் என்றாலே வேகமான ஓட்டமும், ஆமை என்றாலே நிதானமான ஊர்ந்து செல்லுதல் தானே இயல்பு? எனவே இவர்களிடையே வேகத்தில் போட்டி என்பது ஒரு மல்யுத்த வீரனுக்கும் ஒரு பலமில்லாத ஆளுக்கும் நடக்கும் போட்டி போல தானே? எனவே, முயலும்,ஆமையும் ஒருவருக்கு ஒருவர் எதிரியாக எண்ணாமல், வெற்றி இலக்கை சீக்கிரம் அடைவது என்பது இருவரது குறிக்கோளாக இருந்தால், இந்த கதை எப்படி இருக்கும்? முயலும், ஆமையும் இப்போது நண்பர்களாகி விட்டன.

      இருவரும் சேர்ந்து யோசிக்க ஆரம்பித்தனர், இருவருக்கும் சேர்ந்து ஒரு குழுவாக செயல்பட்டால், வெற்றி இலக்கை விரைவில் வெற்றிக்கரமாக அடைய முடியும் என்று புது வழியை கண்டனர். அது எப்படி? நிலப்பகுதியில் முயல், ஆமையை சுமந்து கொண்டு வேகமாக ஓடியது. ஆற்றை அடைந்ததும், ஆமையின் முதுகில் முயல் அமர்ந்து கொள்ள, ஆமை ஆற்றை நீந்தி கடந்தது. மீன்டும் கரையில் முயல், ஆமையை சுமந்து சென்று, வெற்றி இலக்கை தொட்டனர். இருவரும் சேர்ந்து செயல்பட்டதால் இருவருக்கும் மிக்க மனத் திருப்தியும், மகிழ்ச்சியும் கிடைத்தது.

இதனால் கிடைக்கும் நீதி:

தனித் திறமைகள் இருந்தாலும் ஒரு குழுவாக இணைந்து, வேலைகள் செய்தால், பலன் பன்மடங்கு அதிகமாகும். 

இப்போது நமக்கு, சிந்திக்க பல விஷயங்கள் கிடைக்கின்றன.

1. தோல்வியை கண்டு இருவரும் மனம் தளரவில்லை.
2. தாங்கள் உத்திகளை மாற்றி முயற்சி செய்தனர்.
3. ஒருவருடைய திறமை மற்றவர்க்கும் பயன்படும் படி இணைந்து செயல்பட முனைந்தார்கள்.

இந்தக் கதைகளினால் கிடைக்கும் நீதியை புரிந்து கொண்டால், தொழில் துறையானாலும், குடும்ப சிக்கல்கள் ஆனாலும் திறம்பட செயல்பட்டு, வெற்றி கொள்ள முடியும் என்ற நம்பிக்கை நமக்குள் ஏற்படுகிறது தானே!