காதல் போயின் காதல் - குறும்படம் விமர்சனம்

இதுவரை பதிவர் என அறியப்பட்டிருந்த கோவை ஆவி இயக்குனராக, தயாரிப்பாளராக அவதாரம் எடுத்து, அவரின் ஆவி டாக்கீஸ் பேனரில் ஆவியின் குழுவினரின் முதல் முயற்சியாக இன்று வெளிவந்திருக்கும் குறும்படம் "காதல் போயின் காதல்" 

கதை என்ன?

உயிருக்குயிராக காதலிக்கும் இருவரில் காதலி தன் பெற்றோரின் கட்டாயத்தால் "ப்ராக்டிக்கல்ல புரிஞ்சுக்கோ" என காதலனிடம் கல்யாண பத்திரிக்கையை கொடுத்ததோடு பிரிகிறார்கள். அவர்கள் எதிர்காலம் என்னவாயிற்று? அவர்கள் சந்தித்தார்களா? என்ற கேள்விகளுக்கு பதிலை படத்தை பார்த்து தெரிந்து கொள்ளுங்கள்.

ஷைனிங் ஸ்டார் சீனு:

இந்தப்படத்தில் பதிவர் சீனு நடிக்கிறார் என தெரிந்ததுமே பதிவர்கள் வட்டத்தில் அவருக்கு ரசிகர்கள் கூட்டம் உருவானது. படம் வெளியாவதற்கு முன்னமே ஷைனிங் ஸ்டார் பட்டம் கொடுத்து அவரைக் கொண்டாடினார்கள். படத்தில் சீனுவிற்கு இரண்டு கெட்டப். ஒன்று காதலிக்கும் ஸ்மார்ட் பாயாகவும், காதலில் தோற்ற தாடி பாயாகவும் வருகிறார். ஸ்மார்ட் பாய் கெட்டப்பில் நடிக்க ஸ்கோப் இல்லாவிட்டாலும், தாடி கெட்டப்பில் எதார்த்தமாக நடித்துள்ளார். நண்பர்களிடம் தான் வைத்துள்ள பையை பத்திரமாக மீட்பதும், அவள் பயன்படுத்திய பொருட்களை சேகரித்து வைத்து காதலி தன்னுடன் இல்லாவிட்டாலும் அவளது நியாபகங்களாக பொருட்களை வைத்திருப்பதும் என காதலை மறக்காத காதலனாக வாழ்ந்துள்ளார். 

மதுவந்தி:

படத்தில் நாயகியாக, காதலியாக வருகிறார் மதுவந்தி. இவரை மையப்படுத்தியே படம் எடுக்கப்பட்டுள்ளது. அவர்களின் காதல் நாட்களில் பூங்காவில் காபி ஆர்டர் செய்யும் போதும் சரி, காதலனிடம் கல்யாணப் பத்திரிக்கை தரும் போதும் மிக எதார்த்தமாக நடித்துள்ளார். 

நிகழ காலத்தில் தன் பையனுக்கு காரில் அடிபட்டு விட்டதோ என பதறும் காட்சியிலும், முன்னாள் காதலனுடன் காபி சாப்பிடும் காட்சிகளிலும், கடைசியில் கண் கலங்கும் காட்சியிலும் நடிப்பில் சீனுவை ஓவர்டேக் செய்கிறார். இதனால் சீனு ரசிகர் மன்றத்தை கலைத்துவிட்டு மதுவந்திக்கு ரசிகர் மன்றம் ஆரம்பிக்கலாமா என எண்ணிக் கொண்டிருக்கிறேன். 

ரக்சித் சரவணன்:

பதிவர் ஸ்கூல் பையன் சரவணனின் மகன் ரக்சித். படத்தில் பந்து விளையாடிக் கொண்டே கார் வருவது தெரியாமல் காருக்கு குறுக்கே செல்கிறான், அவனைக் காப்பாற்றும் சீனுவை கண்டு மதுவந்தி முன்னாள் காதலன் என அறிந்து காபி சாப்பிட அழைக்கிறாள். அங்கே குட்டிப் பையன் ரக்சித் பேப்பர் கப்பல் செய்யும் காட்சிகளில் இயல்பாய் நடித்துள்ளான். 

இயக்குனர் ஆவி:

கடந்த சில நாட்களுக்கு முன்னமே "வற்றாநதி" புகழ் கார்த்திக் புகழேந்தியின் குரலின் பின்னணியில் டீசர் வெளியானது. அதில் படத்தைப் பற்றிய பெரும் எதிர்பார்ப்பை கொண்டு வந்தது இவரின் முதல் வெற்றி. இந்தப்படத்திற்காக இவரின் பங்கு பெரும்பான்மையானது என்பது படத்தின் டைட்டில் கார்டு பார்த்து அறிந்து கொள்ளலாம். படத்தின் ஆரம்பம் முதல் இறுதி வரை ஒவ்வொரு காட்சியும் அழகாக செதுக்கியுள்ளார். இறுதியில் "சித்தி அல்ல அம்மா என சொல்லுடா" என்ற ட்விஸ்ட் வைத்து படத்தை முடித்துள்ளார்.

நிறைகள்:

படத்தில் ஒளிப்பதிவு அருமையாக உள்ளது. சீனு, மதுவந்தி, ரக்சித், கார் ஓட்டுனராக வரும் குடந்தை சரவணன், காபி அங்கிளாக வரும் துளசிதரன் என அனைவரும் இயல்பாய் நடித்துள்ளார்கள். பொது இடங்களில் குப்பை போடாதீர் என அவ்வப்போது கார்டு வருவதும் நன்று. படத்தின் முடிவை பார்வையாளனிடம் விட்டுவிடுவதும் நன்று.

குறைகள்:

படத்தின் முதல் காட்சியில் நண்பர்களின் நடிப்பு சற்று செயற்கையாக இருக்கிறது. கொஞ்சம் பீலிங்கான காட்சிகளில் பின்னணி இசை இருந்திருக்கலாம். படத்தில் ஒலி அளவு சற்று குறைவாக உள்ளது. ஸ்பீக்கரில் வால்யூம் சற்று அதிகமாக வைக்க வேண்டியுள்ளது.

க்ளைமாக்ஸ்:

இன்றைய பெரும்பாலான தோல்விக் காதல்கள் இப்படிப்பட்ட புரிதலில் வாழ்ந்து கொண்டிருகிறது என எதார்த்தமாய் சொல்லியிருப்பதே "காதல் போயின் காதல்"

காதல் போயின் காதல் - டீசர் - பார்க்க:

காதல் போயின் காதல் - குறும்படம் - பார்க்க: