ஆண்களை ஏமாற்றும் "சுயம்வரம்" தொலைக்காட்சி நிகழ்ச்சி

   

 2009 ஆம் ஆண்டில் முதன்முறையாக தொலைக்காட்சி நிகழ்ச்சி மூலம் தனது கணவரைத் தேர்வு செய்யப்போவதாக நடிகை ராக்கி சாவந்த் அறிவித்தபோது பெரும் பரபரப்பு ஏற்பட்டது. ஆனால் தேர்வு செய்யப்பட்டவரை அவர் திருமணம் செய்து கொள்ளவில்லை. தொலைக்காட்சி நேயர்களை ஏமாற்றிவிட்டனர் என்று அப்போது குற்றச்சாட்டு எழுந்தது. அத்தகைய ஏமாற்று வேலை மீண்டும் ஒரு முறை நடந்துள்ளது. 

    ரதன் காரிஸ்தா என்ற பெயரில் தொலைக்காட்சி தொடர்களில் நடிக்கும் ரத்தன் ராஜ்புத் என்ற நடிகை இந்த நிகழ்ச்சியை நடத்தினார். எட்டு வாரங்கள் நடத்தப்பட்ட இந்த சுயம்வர நிகழ்ச்சியில் 13 ஆண்களை அவர் பேட்டி கண்டார். இந்த நிகழ்ச்சியை ஏராளமானவர்கள் பார்க்கிறார்கள் என்ற நிலை வந்தபோது விளம்பரங்களும் எக்கச்சக்கமாக வந்தன. எட்டு வாரங்கள் கழித்து நிறைவாக அபினவ் சர்மா என்பவரைத் தேர்வு செய்தவுடன், நிச்சயதார்த்தம் மட்டும் நடக்கும் என்று ரத்தன் பல்டி அடித்தார். கேட்டால், நான் நேயர்களுக்கு உறுதிமொழி எதையும் அளிக்கவில்லை. 

     எனது அணுகுமுறையில் நியாயமாக இருந்துகொள்வேன் என்று மட்டுமே கூறினேன். நிகழ்ச்சியை மிகவும் முதிர்ச்சியோடு நான் தொகுத்தளித்ததை நேயர்கள் பார்த்திருப்பார்கள் என்று அவர் கூறிக் கொண்டிருக்கிறார். திருமணம் என்ன சில வாரங்களில் முடிவெடுக்கக்கூடியதா என்று அவர் எதிர்க்கேள்வி எழுப்புகிறார். கிட்டத்தட்ட எட்டு வாரங்கள் ஊதியமில்லா விடுப்பு எடுத்திருந்த அபினவ் சர்மா, மீண்டும் வேலையில் சேருவதில் கவனம் செலுத்திக் கொண்டிருக்கிறார். மொத்தத்தில் நேயர்கள் மீண்டும் ஒருமுறை பரபரப்புக்காக ஏமாற்றப்பட்டுள்ளார்கள்.

  இன்னும் எத்தனை பெண்கள் இந்த மாதிரி ஆண்களை ஏமாற்ற கிளம்ப உள்ளார்களோ? ஆண்களே! பெண்களின் மாய வலையில் விழுந்து விடாமல் கவனமாக இருங்கள்.